Сафар ОЛЛОЁР ижоди:
#Шеъриятда_янги_турдош_жанр

                  Э Ш С О Н Е Т Л А Р      

                 

                             LXXXIV

Қўрқаман – босмасин фироқ зулмати,
Шамс сингари ёлғиз яшаш ҳам даҳшат.
Гарчи ҳажрингчамас ҳар қандай ваҳшат,
Тавозе топаман – ишқинг ҳурмати!

Мен – ал-Ҳақ расулин онгли уммати,
Демасман “Дилимни занжирдан бўшат!”.
Лайли бўлиб, мени Мажнунга ўхшат,
Шунда очилажак тийнат чиммати.

Таҳ-батаҳ иш тутиб таваккалига,
Ғайбга хос сиршунос бўлиб қолдим мен,
Лек каромату кашф қилмасман ҳали.

Малак, нафсу ҳирсни йўлга солдим мен,
Дунё зор эмасми янги валига,
Фахрия жоиз-ку келганда гали!


                                 LXXXV

Севиш-севилишга шартмиди рухсат,
Муҳаббат – бир мавзу ёшу қарига!
Ёлғизлик нораво бандаларига,
Ёр, бизга йўл очар ҳар қайси фурсат.

Биламан, қайдадир соғинар узлат,
Йўқ, чекинмам қўлни силтаб барига.
Матонат берилган ишқпарварига,
Айрилиққа чидаш – ажаб фазилат.

Беқарор очунга иккимиз – зийнат,
Бир дарахтдан боғ йўқ, бир гулдан – чаман,
Улғайиш фаслининг ноёб гавҳари!

Ҳар одамда барҳақ айрича тийнат,
Бармоқ излари ва тил чизиқлари.
Мен эса, ҳамиша ишққа ташнаман!!


                              LXXXVI

Ёр, ишқ яширинган кўнгил қаърига –
Юксак туйғуларда олам сеҳри жо.
Ундан паноҳ топар ҳар зот бехато,
Табиат жонпайваст ўз асарига!

Вале кўнгил душман ситамгарига,
Маслакка очиқ йўл – шукру илтижо.
Шундай бошлангандир балки ибтидо
Дунё йўлиққунча дардисарига.

Ҳақ қўлидан сайқал топгани – бахтдир,
Олий ҳиммат инъом Одам Атога –
Олам мукаммалдир бир парча лойдан!

Таассуф, аъмоли эшдир хатога,
Ҳажринг азоби ҳам лаззатга татир,
Васлинг бўйи келар ҳув хилват жойдан.

"Қалб салтанати" — танланган асарлар,
2-жилд китобидан.

#Шеъриятда_янги_турдош_жанр

                          Э Ш С О Н Е Т Л А Р                                  
       

                                   LXXXVIII

Муттасил улғаяр дилрабо ҳислар,
Эзгуликка ўнғай муҳит мунтазир:
Қалб амрин бажарган – бўлмас дилпазир,
Шубҳасиз, топажак – ким нима истар!

Харита бисоти – яқин-олислар,
Гарчи дўстлар ҳамроҳ, кимдир чоҳ қазир.
Ҳаёт эса, қўймас бермасдан таъзир
Ўзин четга олса баъзан холислар!..

Тобора сердиққат кураш майдони,
Лоқайд-номардлар ҳам чеккада эмас,
Майда масалалар кетган қоришиб.

Эй ёр, ваъдабозлик қўлимдан келмас,
Ҳаёт кўп тинглагай мендай шайдони,
Байтлараро олам борар ёришиб!


                                 LXXXIX

Нетай, тинчлик бермас сертаҳлика сир,
Курашда улғаяр одамзод диди.
Айниқса, бузғунчи ғоя таҳдиди
Дилларга ўтказар номақбул таъсир.

Бадбин кимсалардан қалб мутаассир –
Атрофни тутмасин гумроҳлик ҳиди,
Наҳотки, кор қилмас хатиб танқиди,
Ҳар йўлга йўрғалар нафсига асир!

Ҳали уйғонишга эртамиди ё,
Ё ғафлат тўрига тушганин билмас!..
Нокасни сўкмасдим – бўлса кўнгил тўқ.

Орқасига боққан – олдга интилмас,
Аҳмоқликка сабаб – кўҳна дийдиё,
Муҳаббат кўшкида унга ўрин йўқ!


                                  XC

Лоқайдликка барҳам бериш мавриди:
Илдамлаб бормоқда бугун тамаддун,
Кеча иккиланган вазият учун
Тазарру қўзғатар калом тавҳиди!

Камина – дунёнинг ёш мунаққиди,
Барибир танқидни тан олмас очун.
Муаммо етарли, ечимда тугун –
Катта машваратда кўп ғиди-биди...

Тағин нималарга ундаркан иблис,
Жим туриш – зарбани кутиш дегани,
Ҳақирлар дунёни кезар дарбадар.

Шон талашар, маҳваш, олтин ила мис,
Чавандоз йиқилса кўпкарида гар,
Ўзи ила кетар дулдул югани!

"Қалб салтанати" — танланган асарлар 2-жилд китобидан.

© Сафар ОЛЛОЁР телеграм канали

* * *

Тавба!
Шу сўз чиқар баъзан бўғзимдан,
Яъни, баъзан хато қилганда,
Соқит қилиш учун ўзимдан
Шу каломга қиламан сажда.

Гоҳ шу сўзга топиндим маҳзун
Нуқсонимни аён англасам.
Лекин ўзни оқламоқ учун
Ҳеч бир замон ичмадим қасам.

Биламанки, яхши хислат бу —
Бутун қилса бўлар яримни!
Ким мен учун айлар тазарру
Гар сезмасам хатоларимни:
Тавба...

#Шеъриятда_янги_турдош_жанр

                 Э Ш С О Н Е Т Л А Р                                  
       

                                 XCI

Кўнглимни ром айлар сендаги фусун,
Ҳурлар орасида мен сени севдим.
Бу кунга етиш-чун шамолдай елдим,
Ой чироғим бўлди, кўрдинг, неча тун.

Толе орзуимдай бўлсайди узун –
Некбин ҳиссиётни ҳамроҳим билдим.
Таассуф, шайтонни гоҳ ҳамроҳ қилдим,
Эмди омадимдан ҳар кун олар хун.

Тақдир – ал-Валийнинг айтгани бўлар,
Инонгум манглайим битикларига!!!
Малак, ҳажринг эса, шунчаки синов!

Жонўртар сўзларинг ёдимда қолар,
Тўрт мучал мулки бу – бошимда қиров,
Номадай боқаман алҳол барига.


                                 XCII

Шукурки, дунёга вақтида келдим,
Ўзимни англадим – ақлимни таниб.
Сўнгра ёр кўйида ёниб, ўртаниб,
Дунёга ҳукмрон бўлмоқчи бўлдим!

Не ажаб, сен ила ўйнадим, кулдим,
Ҳатто рашкинга ҳам қолдим ўрганиб.
Нафсим нағмасидан куйиб, орланиб,
Айтмасам бўлмайди, тириклай ўлдим.

Изчил режаларим хатодан холи,
Буткул кўчиб ўтгум кўнглинг кўшкига,
Фақат рухсат берсанг бўлди, маликам!

Мени сарсон қилма Санъон мисоли,
Қаламқош, ишонгум, ул гўшада ҳам
Ал-Қобиз изни бор ошиқ рашкига!!


                               XCIII
    
Дерлар, от қозиғин топар айланиб, 
Албатта, бу нақл Ватан ҳақида.
Кўп ҳиссам бўлсайди юрт равнақида,
Жоним, не наф кўрдим узоқ ўйланиб!

Не топдим бемаврид рашкда айбланиб,
Севги фасонаси – эски ақида.
Яхшиям, дунёга келиб вақтида,
Сенга ошиқ бўлдим ишққа шайланиб!

Шу боис, шукриму фахрим беадад –
Хоқонман муҳаббат салтанатида,
Бундан ортиқ тўкис бахт борми ўзи!

Биламан, мўминда чекли бўлар ҳад,
Бироқ имкон бисёр ибодатида
Ва ўлчаб берилган барча ризқ-рўзи!

"Қалб салтанати" — танланган асарлар 2-жилд китобидан.

#Шеъриятда_янги_турдош_жанр

                 Э Ш С О Н Е Т Л А Р     

                             


                               XCIV

Малагим, соғинчга қалб илҳақ, чида,
Аъмолим ҳақида кўп хаёл сурдим:
Тўла ўталмаган фарзандлик бурчим
Жигарпора рангдир тонг шафақида!

Тулпор салобати янграр тақада,
От устида ҳам, ёр, сенга юз бурдим.
Ватан тузин оқлаш – дилбандлик бурчим
Шаънин ёқлаб назмий мусобақада!!

Қасидалар қўмсар қанча шуаро,
Барига киндик қон гувоҳи азиз –
Талпингани янглиғ бола онага!

Йўлбарс ҳам ногаҳон қолса чорасиз –
Бедор кезар гирён тоғу суваро,
Мен эса, ошиқдим бир жононага!!


                                    XCV

Эверестни бўйлар гарчи қаричим,
Муҳаббат кўшкида жон сақлаяпман.
Шаънингни куйлашдан чарчамаяпман,
Ойда бир тин олсам – ичикар ичим!

Маънан шукронам бу, чин, йўқ ўкинчим,
Жонни бедор айлаб кўп қийнаяпман –
Севги лаҳжасин ҳеч тушунмаяпман,
Менга тилмоч бўлгин, шудир ўтинчим!

Хат-саводим, дилбар, етарли эди,
Оҳангда уқувсиз эканман, чоғи,
Урғую аффикслар фарқи қийнади.

Манглайимда ёрлиқ айрилиқ доғи,
Гарчанд дардим тайин – айтарли эди:
Қисмат мени севги ила сийлади.


                                   XCVI

Оёғим етмаса, кездим хаёлан,
Сайрга алмашдим ҳамма нарсани.
Муҳаббат нафаси билдим лаҳзани,
Илло ишончингни кам оқлаяпман.

Эҳ, сенга нима деб валақлаяпман,
Ўзимга оғдириб олай ларзани:
Диққатимни тортган маъно махзани –
Бетин ишқ китобин варақлаяпман!

Хуллас, икки дунё саодатига
Эришмоқ йўлларин кўп ўйладим мен,
Эмди билдим: бари – ўзингсан, ёрим!

Ўйчил сир бекинар ҳаё қатига,
Шаккокликка йўйма, Парвардигорим,
Шеъргўй қалбим ила рост сўйладим мен!!

#Ўзбек_адабиётининг_янги_жанри

Қ Ў Ш С А Т Р Л А Р

Осмонга қараб қадам ташлаган –
Вақти келган дам панд ейди ердан.

*       *       *
Саводсизликнинг йўқ чегараси,
Лек уни забт этар алифбо саси.

*       *       *
Ўзгалар сабоғи ҳар дам мири кам,
Шахсий тажрибада билик мағзи жам.

*       *       *
Мижғовда сўз йўқ,
Камтарда гап кўп.

*       *       * 
Энг онгли, энг оқил мавжудот – инсон,
Амали аёну аъмоли – пинҳон.

*       *       *
Билганга, мингбошилик – ҳам ғам, ҳам тортиқ;
Бировни бошқаришдан минг бора ортиқ.

*       *       *
Бўлмаганни бўлдириш – гоҳ фазилат, гоҳ қусур,
Мақтов билан ўлдириш – шайтондан юққан унсур.

*       *       *
Мардлар ҳарбу зарбдан чиқиб саломат,
Кўпинча фитнадан кўрган талофат.

*       *       *
Кураш кўп, огоҳ бўл, дўст, ғолиб бўлсанг,
Мағлублар бор экан – тугамайди жанг.

                                                                                        



ҚАДР ТУНИ ТАВАЛЛОСИ    

Икки дунё Сендан уяладиган
Айбу гуноҳимни мағфират эт, Ҳақ.
Тағин билиб-билмай ошса ҳаддидан,
Барча гувоҳимни мағфират эт, Ҳақ!..

Йўқотиб қўймайлик ҳидоят йўлин,
Ажру савобингдан йўқ улуғ туҳфа...
Эларо улуғла саховат мулкин
Ва марҳамат айла қалб таважжуҳга!!

Тазарру қилурман то мавжуд имкон,
Ҳайҳот, қанча иқрор қолган бўғзимда!..
Тавбамга таяндим – амр этса виждон,
Тақвобахш тадорик – мадад қалбимга!!

Икки дунё Сендан уялмайдиган
Солиҳ қулинг бўлай – умидим буюк!
Мағфират этмасанг, ўз “ўз”имга тан –
Маҳшарга ҳам малол елкамдаги юк!..

НАЖОТ ҚЎРҒОНИ

Суст ирода ҳар балога доядир, аслан,
Ваҳима ҳам баттар ўртар безовта жонни.
То ўзингга, эл-юртингга бефарқ эмассан, 
Тўғри танқид қутқаради баниинсонни!..

Айт, ўзингга дўст бўлмасанг, асрайсан кимни?!
Жоҳиллик-ку тингламасанг оқил ҳакимни!..
Йўқ, қайта уқ боболардан қолган айтимни:
Эзгу Умид қутқаради баниинсонни!!

Ким дўст – Эзгу Амалга у Эзгу Сўз улар,
Лек қайсарлик акс эттирар аксар кўзгулар...
Истиғфорда эрур ноёб дуру инжулар –
Имон-Тавҳид қутқаради баниинсонни!!!

Аросатда қолганимиз ёлғонми, наҳот?!
Ҳақ қўлласа, панд бермагай лат еган қанот –
Фақат тавба-тазаррудан топгаймиз нажот, 
Ҳа, ал-Ваҳид қутқаради баниинсонни!!!

  2020.23.03.   19,58   Тошкент.

Telegram kanalimizga obuna bo'ling: 👈

ЯССАВИЁНА 

Қалбимнинг исёнлари
            Қўлга қалам тутаро,
Неки ёзмоқчи бўлсам
           Ҳақдин огоҳ этаро.

Икки мучал кўрибман ―
          Хаёлимда икки йил,
Умрим дарё мисоли 
         Тезкор оқиб кетаро.

Қуш қисматин берибсан,
        Аё, фалак! Назар сол,
Қувончимни дардларим
           Тиш санчмасдан ютаро.

Гоҳида ғариб шодлик
          Улашсанг гар кўнглима,
Оҳ, ажойиб кулбамда
         Бошим кўкка етаро.

Ҳожа Аҳмад Яссавий
        Ўгит берур Сафарға ―
«Мардона бўл, ғариб бош,
        Умринг елдек ўтаро».

#Ўзбек_шеъриятининг_янги_жанри

                                    НАЗМИЯТ МАХЗАНИ

                                                  Учшода 

Вақт оралаб, шеър қоралаб, ойдин хаёл сурган он –
Ишқ маҳсули – умрим гули – ҳар гал қайта гуллайман!
Руҳ орталаб, гул саралаб пешвоз чиқса гар жонон,
Мен – Ҳақ қули, энг мақбули, ҳеч халақит қилмайман...

Ёр, руҳ қўшиб айтсам қўшиқ – унут алёр жонланар,
Яссавийдан сўнг Ҳақ ийган – Ишқ назмимдан тож кийган!!
Кўнглим – ошиқ, сен ҳам жўшиб жон койитсанг жон қадар,
Бу оламда – қувонч-ғамда сабаб бўлмас насия.

Фидойилик – бисёр бойлик: таваккалдан шон қадар,
Шарти – малҳам: баниодам чек қўйса, бас, нафсига...
Дунё – бир кам, кам шу бир ҳам, мендан олсанг тавсия:
Вақт оралаб дард орқалаб – Сўздан сарой қур, эй жон!!!

        2022.21.09. 11,53

                        




АЛОМАТ

Битта одим
ташласанг, бас, йўл илғайсан…
Битта одим
ташлай олсанг – ўзгаргайсан.

Битта одим
йўқни йўқдан бор қилади,
битта одим
дўстни дўстга зор қилади.

Битта одим
ташлар ҳатто қалдирғочлар,
битта одим
билан одам кўкни қучар.

Битта одим
сақлаб турар тартиботни,
битта одим
безар, асли, бу ҳаётни.

Битта одим
Биру Бордан ҳиммат экан,
битта одим –
англаш деган ҳикмат экан!

* * *

Бугун тонгда турдим мен,
        Эртага Худо билар.
Бугуним тиллога тенг,
        Эртам зўр ёмби қадар.

Бугун қирда турибман,
      Эртан тоғда бўлурман.
Узоқлашма ёнимдан,
      Камолимдан ҳузурлан.

Умидларга ҳамоҳанг
        Орзуларим бисёр, бас.
Менга ортиқмас, билсанг,
        Иккимизга кам эмас.

Эртанинг дасти узун,
        Бугун қисқадир, эй жон!
Бугуним — ўзим учун,
        Эртам — сенга армуғон!!

“Омад кўзи” китобидан, 2007 йил

#Ўзбек_адабиётининг_янги_жанри

Қ Ў Ш С А Т Р Л А Р 

*       *       *
Курашга сафогоҳ шоҳсупа тайёр,
Таассуф, устида ғирромлар ҳам бор.

*       *       *
Одам камол топар минг бир ҳунардан,
Одам чоҳ қазишни эплайди баъзан.

*       *       *
Одам борки – улуғлик пойдор,
Одам борки – пасткашлик ҳам бор.

*       *       *
Олқиш кимни бўлдиради,
Кимни эса ўлдиради.

*       *       *
Донолик касали раҳбарларга хос,
Вируси курсида бўлади, холос.

*       *       *
Худбин тўра тўрга чиқса гар,
Йўқ хислатин бор деб айттирар.

*       *       *
Аён, бир томон бўлса айбдор,
Можаро узоқ чўзилмас зинҳор.

*       *       *
Ваъда бажарилса – аҳамиятли,
Йўқса, шармсизлик – жуда уятли.
                                                                                                                   

#Шеъриятда_янги_турдош_жанр

                  Э Ш С О Н Е Т Л А Р                                  

                                 XVIII

Ичидан ёндирар бировни биров,
Дунёнинг бори шу – оловга асир.
Ошиқ қалб учқунга мудом мунтазир,
У учмоқ истаюр кўтариб ялов.

Зеро, музаффар ҳис дўстдир, эмас ёв,
Пойига пойандоз тўшашга арзир;
Ҳижрон азоблари лаззатга татир,
Гарчанд дард дегани камёб ва асов!

Истак эрка, шул ҳис умрий қавм бўлиб,
Ҳеч замон қалбларни тарк айламаса,
Муаззам даргоҳи кенг ал-Ғаффорнинг!

Магар барча ҳисни дилга жамласа,
Ишқдан бошқасига қолмасди тўлиб,
Уланиши маҳол узилган торнинг.
                                                                       2017.14.12. 15,02

                                        XIX

Бизнинг билганимиз – эски асотир,
Қўшиққа айланар баъзан ҳазин дард.
Севги саҳросида ёнмаган – номард,
Оловга чопганнинг – кўзлари басир!

Бу олам сарбасар тилсим ила сир,
Англаганим: ишққа юқмас асло гард
Ва ўтрик ҳаётдан қўрқиб яшар мард,
Бу – мунглиғ куй эмас, жўшқин хандадир!

Оромпарвар онлар – ҳижронда, асли,
Такаллуф лаҳжаси жарангдан холи,
Қисмат синовлари – жонли имтиҳон.

Навқирон шижоат сирдош эмасми,
Нафосат бағрида тўлғанса ҳам жон,
Ошиқ аҳлин минбаъд дуруст аҳволи!
                                                                  2017.14.12. 17,35

                                       XX

Умидлар баравж, ёр, кўз ёшларинг арт,
Навобахш оҳанглар ботинда бисёр.
Барчасин ажойиб жозибаси бор,
Бири вазмин бўлса, бири – авангард.

Шу сирдан воқифдир ҳар бир жавонмард,
Зотан, у рўй берар ғоят бетакрор –
Ҳар Қалбни муҳрлар Моҳир Муҳрдор,
Бу жабҳада Ишқ ҳам қатнашиши шарт!

Камина ҳакамлик қила олмасман,
Гарчанд ҳали бисёр билмаганларим,
Шеърим фикру ташбиҳ ила бокира.

Ишқдан сайқал топган барча асарим,
Лек баъзан панд едим разил-нокасдан.
Ундайларга ишим тушмасин сира!
                                                                           2017.14.12. 

"Қалб салтанати" — танланган асарлар 2-жилд китобидан.

#Ўзбек_шеъриятининг_янги_жанри

           КЎЗГУ МЎЪЖИЗАСИ

                      Учшода


Кўзгу олдида соч тарасам гар –
Кўнглим ичра бир дилдор кўрингай.
Ортга ўгрилиб ташласам назар:
Ўшал париваш такрор кўрингай!..

Минг йилдан буён шу ҳол намоён,
Васлий фаслидан қалбга қўр ингай:
Севгинг, сирларинг кўзгуда аён,
Акс этар зулфинг, тароғингда ҳам!

Ошиқ кўнглимда ғалат ғалаён:
Кўзгуга боқсанг – қароғингда ғам!..
Тошойнадан рашк қилдим, маликам,
Кўзим ўнгида соч тарасанг гар!!
          
2014.23.12.