1
Ортингиздан қўярман қадам,
Ҳар бир босган изингиздаман.
Бўйингизга ўхшар бўйим ҳам,
Дада сизни ўғлингиздаман!
Номард аблаҳдан юзим бурдим,
Мудом айтган сўзимда турдим,
Сизга ўхшамоққа уриндим,
Дада сизни ўғлингиздаман!
Харом луқма ютмадим зинҳор,
Шукур, қалбда иймон, орим бор,
Яхшиликка бўлдим харидор,
Дада сизни ўғлингиздаман!
Вафодорлик сиздан меросдир,
Ҳақни сўзлаш мўминга хосдир,
Кийимингиз менга ҳам мосдир,
Дада сизни ўғлингиздаман!
Хизматингиз қилайин дейман,
Ёнингизда юрайин дейман,
Сиздек дада бўлайин дейман,
Дада сизни ўғлингиздаман!
Ёзган шеърларимнинг шаҳди сиз,
Умрим тожи, кўнглим тахти сиз,
Отабекнинг тўкис бахти сиз,
Дада сизни ўғлингиздаман!
2
Қарашларим паришонхотир,
Кўз намланар орада бир-бир,
Нетай қисмат, нетай бу тақдир,
Мен кетяпман мусофир бўлиб!
Кимга қўрқоқ, кимларга зўрман,
Кимга ёқмас, кимга манзурман,
Бугун кетмоқликка мажбурман,
Мен кетяпман мусофир бўлиб!
Энди шодон кунларим қайда?
Ойни қучган тунларим қайда?
Этиб юрагим майда-майда,
Мен кетяпман мусофир бўлиб!
Оҳ янграйди юрак қаъридан,
Ҳаёт кулар ортдан-наридан,
Дўсту яқинларим бағридан,
Мен кетяпман мусофир бўлиб!
Кетишимга вақт қолди яқин,
Тарк этаман қишлоқ кўчасин,
Қўлга олиб онам кулчасин,
Мен кетяпман мусофир бўлиб!
Сатрларим дард олди кириб,
Қувончлари олди беркиниб,
Қалам қоғозимни қолдириб,
Мен кетяпман мусофир бўлиб!
3
Йўқламайсиз, кунлар ойга уланибди,
Келмадингиз ҳолим сўраб бир мен томон.
Йўлингизга муштоқ боқар бу кўзларим,
Қўнғироғим жавобсиздир ҳали ҳамон.
Келинг, бағрим очиб сизни кутиб олай,
Соғинч ўртаб, юрагимга бориб етди.
Қўрқманг мендан, касал эмас соппа соғман,
"Пандемия", "карантинлар" ўтиб кетди.
Умр ўтиб бораверар биздан нари,
Биз ҳар қачон яшамоққа курашамиз,
Тугамайди бу дунёнинг ташвишлари,
Келинг дўстим шомга томон кўришамиз.
Дилдан суҳбат қурмоқликка нима етсин,
Бир дийдорга тенг эмасдир ҳеч неъмати.
Дўстижоним, бугун сизнинг дийдорингиз,
Бир қишлоқи шоирингиз қумсаяпти.
Юрак ҳамон сиз томонга интилмоқда,
Айтар гапим жуда кўпдир бугун сизга.
Дўстим ушбу соғинчнома шеърим ўқиб,
Келаверинг ўша эски жойимизга!
4
❗❗❗
Мен сенгаю сенчи менга мос,
Қадрлайман диёнатингни.
Ўйлаб-ўйлаб қадамингни бос,
Кечирмайман хиёнатингни!
Вафо инсон умрининг нақши,
Вафосизга ер юзи қарши,
Ундан кўра ўлганинг яхши,
Кечирмайман хиёнатингни!
Мендан раҳм кутмагин бунда,
Тарк этаман мен ўша кунда,
Кечиримлар сўрама шунда,
Кечирмайман хиёнатингни!
Ҳар ишингдан қолар ортда из
Пушаймон ман деб сўнг чўкма тиз,
Эҳтиёт бўл эй мен севган қиз,
Кечирмайман хиёнатингни!
Вафосизни кутар жаҳаннам,
Ёдингда сақла сўзим ҳар дам,
Адашмагин бир бор бўлса ҳам,
Кечирмайман хиёнатингни!
5
Юрагимда харос туйғу,
Кўзларимга келмас уйқу,
Сенга берар саволим шу:
Болам бунча ҳаялладинг!?
Йўлинг қараб ўтаяпман,
Армон томон кетаяпман,
Кела қолгин, кутаяпман,
Болам бунча ҳаялладинг!?
Соғинчлари қилар таъна,
Баҳор ўтиб борар мана,
Сочимга оқ тушди қара,
Болам бунча ҳаялладинг!?
Азоблари уради дўқ,
Юрагимга санчиблар ўқ,
Ҳалигача дарагинг йўқ,
Болам бунча ҳаялладинг!?
Суратингга тикилганман,
Қадди дол-эгик танман,
Сени жуда соғинганман,
Болам бунча ҳаялладинг!?
Онанг томон чипта олгин,
Саҳар туриб йўл отлангин,
Отабегим қайта қолгин,
Болам бунча ҳаялладинг!?
6
Кўкда юлдуз милтираб,
Турибди ой наздида.
Мен эса мижжа қоқмай,
Ёнаман шеър ҳажрида.
Кўзга уйқу илинмас,
Бўлса ҳам ярим кеча.
Шеърнинг ҳажрида бедор,
Ўтган тунларим неча.
Шоирга ҳам кўп осон
Тутманг, хато қиласиз.
Ҳар бир сатр қадрини,
Шеър ёзсангиз биласиз.
Розидирман ҳар туним,
Қалам-ла ўтсин бедор.
Дўстлар, кўплаб тонгларни,
Уйқусиз кутганим бор.
Бу гал ҳам кипригимга,
Қўнмади уйқу сира.
Тонг ҳам ёришай деди,
Ой, юлдуз тортди хира!
7
Майли, йиғла ёшинг сел бўлсин,
Бир меҳрибон инсонинг учун.
Аммо қадринг билмас ҳаққига,
Кўз ёшларни тўкмоқлик нечун?
Ахир сенинг қалбингни доим
Ранжитганни ўйлайсан нечун?
Хаёлингдан чиқаргин десам,
Йиғлаб чиқдинг неча туну кун.
Келгин юрак, унутгин энди,
Унут ӯшал гулузорингни.
Сенга вафо қилмади нетай,
Берган бўлсанг ҳамки борингни!
8
Ташладилар юрагимга андўҳ қалаб,
Совчиларим қайтардилар кўп марталаб,
Бугун оғзи ёпилмайди менга қараб,
Бир бор кўнгил кўчасига кирмаганлар,
Менсимасдан қизин менга бермаганлар!
"Осмон" бўлиб даврларин сурдиларда,
Ўзларини биздан устун кўрдиларда,
Ёки атай устимиздан кулдиларда,
Бир бор кўнгил кўчасига кирмаганлар,
Менсимасдан қизин менга бермаганлар!
Чидай олдим айрилиқнинг қийноғига,
Дош беролдим азобларнинг қайноғига,
Майли, қизин берсин мендан зўрроғига,
Бир бор кўнгил кўчасига кирмаганлар,
Менсимасдан қизин менга бермаганлар!
Гап-сўзлари берган эди қанча озор,
Айлаганди кўзларимга дунёни тор,
Кун келади, кўзлар кўзга тушмоғи бор,
Бир бор кўнгил кўчасига кирмаганлар,
Менсимасдан қизин менга бермаганлар!
Омон бўлинг, сизга бошқа сўз демадим,
Барчасига розиман, тақдир атадим,
Қизингизга Яратгандан бахт тиладим,
Бир бор кўнгил кўчасига кирмаганлар,
Менсимасдан қизин менга бермаганлар!
Шеърим битди, сўз тугади, энди боринг,
Бу гапларим ёдингизда сақлаб қолинг,
Отабек ман, мени яхши таниб олинг,
Бир бор кўнгил кўчасига кирмаганлар,
Менсимасдан қизин менга бермаганлар!
9
Ёдимдадир қўлим тутиб юрганинг,
Онажоним дея мени суйганинг,
Ушбу кунда илк қадамни қўйганинг,
Бахт саройинг муборак бўлсин қизим!
Меҳринг мени ўзига ром айлаган,
Шукр ҳаёт сени менга сайлаган,
Аллоҳ сенга буюк бахтни шайлаган,
Бахт саройинг муборак бўлсин қизим!
Ўзингдирсан ушбу кеча чиройи,
Сени кутар бахтнинг тўкис саройи,
Ўзингдирсан онангнинг эркатойи,
Бахт саройинг муборак бўлсин қизим!
Сўрагайман бахтингни Яратгандан,
Фарзанд берсин ширинроқ шакар қанддан,
Бахтли бўлгин бу ҳаётда ҳаммадан,
Бахт саройинг муборак бўлсин қизим!
10
Фойдам тегса ёнимдан жилмас,
Синсам бир бор қўнғироқ қилмас,
Яхшиликларим сира билмас,
Сохталардан чарчадим жуда!
Дастурхонда ошимга тайёр,
Тилёғлама, тулкидай айёр,
Бир танида икки юзи бор,
Сохталардан чарчадим жуда!
Ишончимга кирадиларда,
Ортдан пичоқ урадиларда,
"Пахтадан" кун кўрадиларда,
Сохталардан чарчадим жуда!
Вафони ҳам бўғзидан осди,
Ҳасад тўла юраги ости,
Тегиб кетди жонимга рости,
Сохталардан чарчадим жуда!
Десам, асил мақсадин билай,
Ўзгаради ҳар куни тинмай,
Маслаҳат беринг, нима қилай,
Сохталардан чарчадим жуда!
Кўришганда қучади маҳкам,
Чарчаманг дер, бўлинг дер бардам,
Лек синишим кутишар ҳар дам,
Сохталардан чарчадим жуда!
Шоқол, аммо ўзин билар шер,
Шодон, Оташ қадри бўлса ер,
Эй, Худойим ўзинг инсоф бер,
Сохталардан чарчадим жуда!
