ВАТАНИНГ
Ватанинг чаман болам,
Чаманинг асра болам.
Сассиқ алаф ўсмасин,
Чаманинг ҳидланмасин!
Қадрига ет, авайла,
Хизматга ўзинг шайла.
Хушёр тургин жон болам,
Чаманинг кирланмасин!
Чаманингни қўриқла,
Қорачиғингек сақла.
Хушёр бўлгин,жон болам,
Чаманинг зорланмасин!
Ватанинг бу ўзлигинг,
Қорачиғинг кўзлигинг.
Ўзликдан кечма, болам,
Ўзлигинг йўқолмасин!
Нур Муҳаммад Ҳасан
ОНАЖОНИНГ РОЗИ ҚИЛ
Бўлай десанг жаннати,
Расулуллоҳ уммати.
Яратганнинг ҳиммати,
Онажонинг рози қил!
Тўққиз ойнинг ҳаққин бил,
Дард азоби қийин, бил.
Нима бўлса ҳақдин бил,
Онажонинг рози қил!
Дунё иши тугамас,
Онанг мангу яшамас,
Меҳрсизлик ярашмас,
Онажонинг рози қил!
Борини бериб қўйди,
Сени эркалаб суйди,
Бурчин бажариб қўйди,
Онажонинг рози қил !
Энди сенинг навбатинг,
Кўрсатиб қўй ҳимматинг.
Онанг ахир, давлатинг,
Онажонинг рози қил !
Умидворсан жаннатдан,
Қолмагин ҳеч ҳимматдан.
Тонмагин ҳеч хизматдан,
Онажонинг рози қил!
Нур Муҳаммад Ҳасан
ИНСОНМИЗ
Инсонмиз, атаймиз ўзни кўп ақл,
Ақллилик қилиб мослаймиз нақл.
Баъзан устун бўлар беақл эшак,
Тўқиган нақлимиз мос келмас бешак.
Ҳийлаю макрда устун деб тулки,
Бечора тулкини қиламиз кулгу.
Ҳийлада тулкини қолдириб доғда,
Қаҳ қаҳа отамиз баъзи бир чоғда.
Қарғанинг кўзини чўқимас қарға,
Насиҳат тарзида такрорлар дарға.
Қарға қилмаганин қиламиз лекин,
Билдирмай ўямиз кўзларни секин.
Бўрининг гўштини емайди бўри,
Кам зўрини ташлаб кетмайди зўри.
Одам бўлиб еймиз одам гўштини,
Сурмоқ ниятида ҳаёт гаштини.
Кимнидир атаймиз мусича мисол,
Қўй оғзидан чўп ҳам олмаган тимсол.
Жин чалиб кетдими,қолдириб ҳайрон,
Тил билан яралар,дил бўлар вайрон.
Ақлимиз пеш қилиб қиламиз жафо,
Керагида итчалик қилмаймиз вафо.
Сира иккиланмай , юрак тиламиз,
Баъзан ҳайвондан ҳам пастлик қиламиз.
Инсонмиз, санаймиз ўзни кўп ақл,
Ҳайвонларга менгзаб мослаймиз нақл...
Нур Муҳаммад Ҳасан
@hasanov_ijodi
ҚАДР КЕЧА ИЛҲОМЛАРИ
Қадр кеча - нур кеча, жаннатга йўл очилар,
То тонггача ушбу тун, дуога қўл очилар.
Сидқидилдан қил дуо, ижобати бўлади,
Меҳнат кўнгилдан бўлса, саҳрода гул унади.
* * *
Хотиржам кўнгил қуши, ҳаловатни истайди,
Ҳаловат топган кўнгил, саодатни истайди.
Саодатга элтувчи имкон асли шу тунда,
Имконни ким қидирар, ижобати шу тунда.
Нур Муҳаммад Ҳасан
БЕЧОРА МУҲАББАТНИ
( Мушоира учун)
Бугун муҳаббатни қатл этдилар
Заҳро Шамсия
Пок эдику муҳаббат,
Соф эдику муҳаббат.
Не учун муҳаббатни,
Бугун қатл этдилар?
Осмон эди муҳаббат,
Достон эди муҳаббат.
Гуноҳсиз муҳаббатни,
Нега қатл этдилар?
Муҳаббат бир куч эди,
Дилларга қувонч эди.
Армон, воҳ муҳаббатни,
Нега қатл этдилар?
Икки кўнгил сўлдия,
Паймонаси тўлдия.
Куйдириб муҳаббатни,
Нега қатл этдилар?
Топталди кўп муҳаббат,
Алданди хўп муҳаббат.
Бечора муҳаббатни,
Бугун қатл этдилар.
Пок бўлмаган муҳаббат,
Соф бўлмаган муҳаббат.
Ўлимга маҳкум эди,
Бугун қатл этдилар.
Нур Муҳаммад Ҳасан
ТИРИКМИСАН, ҚИМИРЛАБ ТУРГИН
Оқмаган сув сасий бошлайди,
Оқмаган сув қурий бошлайди.
Тирикмисан, қимирлаб тургин,
Оққан сувдек жимирлаб тургин.
Қимирлаган қир ошар дерлар,
Интилганга толе ёр дерлар.
Умид билан олдинга интил,
Оқмас сувдек қуриб қолмагин.
Қимирласанг насиба бордир,
Насибангга барака ёрдир.
Насибангни ҳалолликдан тер,
Зилол сувдек жимирлаб тургин.
Эй, биродар турмагин бекор,
Бекорчига дунё бўлар тор.
Тор айлама дунёни зинҳор,
Оқмас сувдек сасиб қолмагин.
Оққан дарё оқаверади,
Оққан сари ёқаверади,
Жўшқинлангин дарёга ўхшаб,
Эзгу ишда сира толмагин.
Нур Муҳаммад Ҳасан
БИЗ СЕНИ КУТАМИЗ
Биз сени кутгандик, кутгандик интиқ,
Мусулмон аҳлига оллоҳдан тортиқ,
Ташрифинг бизларга ҳар недан ортиқ,
Биз учун азизсан, Моҳи Рамазон!
Меҳмон бўлиб келдинг, бўлдик кўп шодмон,
Аҳли мусулмонга етишди замон,
Адо этмоққа фарз, туғилди имкон,
Биз учун азизсан, Моҳи Рамазон!
Ҳар дамгидан ортиқ қилиб ибодат,
Қалбларимиз топди ҳузур- ҳаловат.
Руҳлар ором олди, танлар шифоат,
Биз учун азизсан, Моҳи Рамазон!
Шукурки бағрингда яшадик омон,
Уммат бўла олдик ҳар замон, ҳар он.
Истиғфор айтишга тополдик имкон,
Биз учун нажотсан, Моҳи Рамазон!
Шубҳасиз, руҳларни покладик обдон,
Бўлди мағфиратдан кўнгиллар шодон,
Қанийди қосайдинг, бўлиб қадрдон,
Сен бизга нажотсан, Моҳи Рамазон!
Қўйворгимиз келмас, кўзимиз қиймас,
Кетмагин деймизу, ҳаддимиз сиғмас,
Яна қайтасанку, сўнггиси эмас,
Биз сени кутамиз Моҳи Рамазон.
Нур Муҳаммад Ҳасан
БОЛАЛИК УЗОҚДА ҚОЛИБ КЕТИБДИ
Болалик бағрига мўралаб кўрдим,
Хаёл дарёсида жавдираб турдим.
Кирмоқчи бўлдиму, топмадим эшик,
Туйнукдан боқсамда ҳаяжон туйдим.
Тор кўча билмадим, қайга кўчибди,
Лой сувоқ уйлар ҳам қайга кетибди.
Қўшнига ўтарга топмадим камтик,
Хаёл кўчасида анграйиб қолдим.
Ҳайрият, анов тут ҳали турибди,
Шохлари сийраклаб калдай бўлибди.
Оқ пишар мевасин топмадим боқиб,
Хаёлларга миниб учиблар кетдим.
Оғзимда чиллигим зувуллаб учдим,
Кичик ариқчани лойлатиб кечдим.
Чигитдай довчани оғзимга солиб,
Шўргина таъмидан тамшаниб қўйдим.
Кўримсиз, кичкина лойсувоқ мактаб,
Бўрвой ботинкамни кийганим мақтаб.
Кино тасмасидай кетарди ўтиб,
Болалик даштида адашиб кетдим.
Кимларни изладим топа олмадим,
Неларни қувладим, ета олмадим.
Болалик узоқда қолибди кетиб,
Хаёл кўчасида адашиб қолдим,
Нур Муҳаммад Ҳасан
ЮЗИМИЗ ЕРЛАРГА ҚАРАТМА, ҚИЗИМ
(Оналар тилидан)
Қизим, қизалоғим, бутун вужудим,
Борлиғим деганим, сенсан умидим.
Деганман мен сени, юзимсан юзим.
Юзимиз ерларга қаратма,қизим!
Унутиб бўларми ўтган кунларим,
Минг битта азобни тотган тунларим.
Миннат қилганим йўқ, сенга ой қизим,
Фақат қаратмагин ерларга юзим!
Оғзимдагин ютмай сенга илиндим,
Камингни кўрмайин дея куюндим.
Ахир ўзингсанку, менинг ой юзим,
Ой юзингни ерга, қаратма қизим!
Бўйларинг ўсибди тенглашиб бўйим,
Кундан кун бормоқда кўпайиб ўйим.
Оғир олмай қизим, эшитгин сўзим,
Юзимизни ерга қаратма қизим!
Ибога тўлдиргин сўзинг садосин,
Ҳаё билан суғор кўзинг ибосин,
Жон қизим, жонингга берсина тўзим,
Юзимиз ерларга қаратма қизим!
Битта гул берганга учиб кетмагин,
Сочилган донни ҳам шошиб термагин.
Балки бир тузоқдир, англагин сўзим,
Юзимиз ерларга қаратма қизим!
Бахтингни кўрайин қувонсин кўзим,
Сен билан ёришсин, ёришсин юзим.
Шунчаки демагин насиҳат сўзим,
Юзимиз ерларга қаратма қизим!
Нур Муҳаммад Ҳасан
НОРЛАР БОРКИ
Бойлари бор, зўрлар бор,
Пул ҳидидан мастлар бор.
Гар қаторда норлар йўқ,
Ҳиммати йўқ, пастлар бор.
Фақирлар бор, зорлар бор,
Чиқиш қийин, чоҳлар бор.
Эшитилмас,оҳлар йўқ,
Гар қаторда норлар бор.
Норлар элнинг ишончи,
Керагида таянчи.
Агар элда норлар йўқ,
Чўзилмайди қувончи.
Норлар борки, орлар бор...
Нур Муҳаммад Ҳасан
ҚУРИБ КЕТСИНА ШУ КЕККАЙГАН ҒУРУР
Олдинга юраман қадамим оғир,
Ортимга қарасам юрагим оғрир.
Қайт дейди,ортингга ранжиган кўнглим,
Аммо ғолиб келар кеккайган ғурур.
Қанчалар севишим биласан сен ҳам,
Сенинг ҳам севишинг биламан мен ҳам.
Лекин иккимизда ҳам гердайиш кибр,
Кибрдан куч олар кеккайган ғурур.
Севаман демадим ўзимча мағрур,
Сен ҳам демадинг,менданда мағрур.
Юраклар тортсада ортиқча жабр,
Ғолиб бўла олди кеккайган ғурур.
Бунчалар ўхшадик бир биримизга,
Қулоқ солмадик а, бир кўнглимизга.
Мағлуб бўлдик охир биз кибримизга,
Қуриб кетсина шу кеккайган ғурур.
Нур Муҳаммад Ҳасан
КЕЧОЛМАЙМАН ҲЕЧ
Боқиб жамолингга тўёлмайман ҳеч,
Қарашдан кўзимни тиёлмайман ҳеч.
Парисан ё пайкар, билолмайман ҳеч,
Не ажаб, бандасан деёлмайман ҳеч!
Чиройингдан ҳатто уялади ой,
Юзингдан нур олган қуёш ҳойнаҳой.
Бандада бўлурми шундайин чирой,
Не ажаб, бандасан деёлмайман ҳеч!
Тола сочинг десам, бир достон бўлур,
Қошу кўзинг десам, минг достон бўлур.
Сарв қоматинг десам,тенг уммон бўлур,
Не ажаб, бандасан деёлмайман ҳеч!
Боқмай жамолингга туролмайман ҳеч,
Биламан васлингга етолмайман ҳеч.
Етолмайман дея кечолмайман ҳеч,
Не ажаб, бандасан деёлмайман ҳеч!
Нур Муҳаммад Ҳасан
* * *
Қайғунгни оқизгин дарёга,
Дардингни сўзлагин сабога.
Дилингни ким агар оғритса,
Унутгин солгинда худога.
* * *
Ғийбатдан қочмасанг узоққа,
Таъмага гар тушсанг тузоққа.
Нафсингга қулдирсан,билиб қўй,
Тайёр тур, кун келар сўроққа.
* * *
Ёмонга ёмонсан демагин,
Яхшини яхши деб алқагин.
Керак бўлиб қолса қозилик,
Адолат йўлини танлагин.
Нур Муҳаммад Ҳасан
ТИЛАГИМ СЕНДАН ХУДОЙИМ
Боғламагин йўлимни,
Очиб қўйгин худойим.
Ўтиниман юзимни,
Ёруғ қилгин худойим.
Қўлимни очиқ қилда,
Ҳаловат бер кўнглимга.
Кунимни ёруғ қилда,
Хотиржамлик тунимга.
Номардларга қилма тенг,
Нишон қилма балога.
Марҳаматинг қилгин кенг,
Етказгин муддаога.
Сокин бўлсин самоим.
Ҳидоят қил худойим.
Тинчликни бериб доим,
Иноят қил худойим.
Нур Муҳаммад Ҳасан
* * *
Табассумла боқинг мулойим,
Жилмайингиз барчага доим.
Сизни кўриб қувонсин қалблар,
Шунда севар сизни худойим.
* * *
Қувватимиз сиздан яхши одамлар,
Йўлларимиз очиқ, шахдам қадамлар.
Беминнат ҳимматга доимо шайсиз,
Борингизга шукур, яхши одамлар!
* * *
Демоқчи бўлганим сўзим ғанимат,
Боқмоқчи бўлганим кўзим ғанимат.
Ғанимат бўлмаган аслида не бор,
Ўткинчи дунёда ўзим ғанимат.
Нур Муҳаммад Ҳасан
* * *
Ҳақиқатни очган ҳам шу кўзлар,
Ҳақиқатни ёпган ҳам шу кўзлар,
Туядек айбни кўрмасдан қолиб,
Жимит айбни сотган ҳам шу кўзлар.
* * *
Бўлди ёнди, ўчди демагин,
Кули қолди энди демагин.
Умид қилгин, чўғи қолгандир,
Йўлин топсанг, балки ёнгайдир.
* * *
Ҳасадлардан бўлиб эҳтиёт,
Ҳавасларла юраман доим,
Нолиш эса менинг учун ёт,
Табассумдир мудом чиройим.
Нур Муҳаммад Ҳасан
ЮР, МУҲАББАТ
Юр, муҳаббат тоғлар қўйнида,
Сабр қилиб яшаб кўрамиз.
Киши билмас ғорлар бағрида,
Жимжитликка жўра бўламиз.
Балки ғорда айиқ уйқуда,
Қучоғида ором оламиз.
Меҳр туйиб унинг қўйнида,
Меҳрга биз ошно бўламиз.
Насибамиз бўлар шу ғорда,
Бўлганига шукур қиламиз.
Қаноатни ўрганиб шунда,
Нафсимизга жилов соламиз.
Хиёнат йўқ, алдов йўқ унда,
Ғийбатлардан узоқ бўламиз.
Ҳасадларни ўлдириб дилда,
Ўзимизни поклаб оламиз.
Имон нима, нима диёнат,
Балки озроқ ўйлаб кўрармиз,
Инсон учун меҳр-оқибат,
Зарурлигин англаб етармиз.
Қариндошдан бўлиб узоқда,
Соғинч ҳиссин балки туярмиз.
Жигарлардан яшаб йироқда,
Дийдор нима қадрин билармиз.
Кўрмай бунда очиқ-сочиқни,
Кўзларга ҳам ҳаё солармиз.
Айтмай унда ёлғон- ёшиқни,
Лафзимизга эга бўлармиз.
Кибр нима, ундан юз буриб,
Мақтанишдан ўзни тиярмиз.
Самолардан кўзимиз узиб,
Тупроққа ҳам юзни бурармиз.
Юр муҳаббат, яшаб кўрайлик,
Ваҳимасиз, осуда жойда.
Танимизга ўйлаб кўрайлик,
Ожизгина бандамиз, банда.
Беғуборлик хуш ҳавосидан,
Тўйиб-тўйиб нафас олайлик,
Оллоҳимнинг марҳаматидан,
Руҳимизни поклаб келайлик.
Баланд тоғлар, чўнг қоялардан,
Сабр нима, билиб олайлик,
Қор тоғлар, муз соясидан,
Сабр нима, билиб қайтайлик.
Ўрганайлик қадр қимматни,
Яшаш учун бўлар кераги.
Одамийлик, меҳр-ҳимматни,
Деб билайлик одам зийнати.
Юр, муҳаббат тоғлар қўйнида,
Инсон бўлиб қайтиб келамиз...
ВИСОЛ МАЙИН ИЧАЙЛИК БИРГА
Кел бугун висолни чорлайлик тўрга,
Кўнгиллар тўлсинлар бир ажиб нурга.
Фироқлар ёнсинлар чарсиллаб ўтда,
Висол куйларини чалайлик бирга.
Биргаликда висолни қилайлик меҳмон,
Ичиккан қалбларда қолмасин армон.
Ҳижрон деганлари қолсинлар доғда,
Висол қўшиғини куйлайлик бирга.
Қўйиб бер чарх урсин бизнинг туйғулар,
Қочиб қолсин соғинч, фироқ, қайғулар.
Дийдор деганлари қилсин тантана,
Висолнинг майини ичайлик бирга.
КЕЛГИН СЕНИ БАҒРИМДА АСРАЙ
Қирларимда ўсган қизғалдоқ,
Не сабабдан куксинг бунча доғ?
Қалбингда бор недандир титроқ,
Келгин сени бағримга олай.
Асрай сени ёмғир дўллардан,
Асрай сени довдир қўллардан.
Дайдиланган чопқир селлардан,
Келгин сени бағримга олай.
Топилмаган пешонанг топай,
Қизғалдоғим, авайлаб ўпай.
Асрамоқнинг йўлини топай
Келгин сени бағримга олай.
Титрамагин боримни берай,
Саргайсанг гар қонимни берай.
Садқа сенга жонимни берай,
Келгин сени бағримда асрай!
* * *
Нигоҳим қумсайди нигоҳларингни,
Лашкари саф тортган қароғларингни.
Балдоғи ярашган қулоқларингни,
Кўзларинг англатган сўроқларингни.
Ёқуби олмадай ёноқларингни,
Таърифин билмаган дудоқларингни,
Қумсайди қўлдаги қадоқларингни,
Ҳаёга беркинган қароқларингни.
Қулоғимга тунлар шивирлар сасинг,
Эшитилгандай бўлар соҳир нафасинг.
Йўқлаб турар доим орзу, ҳавасинг,
Нигоҳим қумсайди нигоҳларингни.
